إعدام طلاب ثانوى.

 انهيار التعليم بمصر ينعكس بمنتهى الوضوح فى المدارس الحكومية فعلى الرغم من ان الحكومة بتحلف لنا على المصحف ليل نهار ان التعليم ومكافحة التسرب من التعليم والقضاء على الامية هو شاغلها الشاغل، إلا أنها لم تجرؤ على الغاء مصاريف مرحلة التعليم الاساسى التى تمثل عبئا على الفقراء وبالتالى لم ولن ولا تفكر فى منح الفقراء اعانات شهرية مالية لتمنع حالة التسرب من التعليم والتى سببها الرئيسى هو الفقر ، هذا بخلاف المناهج الدراسية التى لا تسمن ولا تغنى من جوع واسلوب التدريس الفقير حتى من ابسط درجات العلاقات الانسانية التى ينبغى ان تسود بين الطلاب ومدرسيهم حيث اختزل الطالب الى 20 او 40 جنيه ملقى فى الفصل وينتظر من يحلبه .

أجرينا حوار مع طلبة مدرسة إمبابة الثانوية العسكرية بنين التى تعد من أكبر وأقدم المدارس الثانويه فى محافظ الجيزة حيث يبلغ تعداد طلابها حوالى 6 ألاف طالب مقسمه على الثلاث مراحل الدراسية , وكل مرحله تنقسم إلى حوالى 27 فصل للمرحلة الواحدة ,تقع مدرسة إمبابة الثانوية العسكرية بنين بجوار ميدان التروللى بالقرب من أرض عزيز عزت وقمنا بالحوار مع طلابها وكان أولهم طالب يدعى /محمد سمير طالب بالصف الثالث الثانوى وسألناه

إية أحوال المدرسة والدراسة معاك ؟ 

المدرسة حالها زى حال باقى المدارس زحمة ومبانيها قديمة والفصل الواحد فيه 70 طالب وساعات بنقعد على الأرض .

طب والمدرسين عاملين إية ؟

المدرسين معظمهم كويسين و الباقى مش بيشرح حاجة علشان يخلونا ناخد دروس خصوصية ووقت الحصة بقى قصير من ساعة المدرسة ما بقت فترتين ,فمبقناش نقدر نفهم حاجة , الفترة الأولى للصف الأول الثانوى والفترة الثانية لطلاب الصف الثانى والثالث الثانوى .

ووجدنا ثلاث طلاب خارج المدرسة بعد بدء اليوم الدراسى وسألناهم ,

إنتوا مدخلتوش المدرسة لية ؟

 قالوا محنا مش هنستفيد حاجة كدة أحسن .

إنتوا بقى بتخدوا دروس خصوصية ؟

فى بعض المواد مش كلها لان عندنا 14 مادة فى سنة أولى وأهالينا مينفعش يدونا دروس فى كل المواد دى فبناخد فى مواد معينة زى الرياضيات والكمياء والفزياء ...كدة يعنى.

طب والدروس الخصوصية أسعارها إية ؟

على حسب المادة وعلى حسب المدرس بس معظم الدروس بـ 60 جنيه فى الشهر .

طب متاخدوا مجموعات مدرسية ؟

إحنا عندنا نوعين من المجموعات مجموعة عادية ومجموعة مميزة, المجموعة العادية بـ20 جنية وعدد الطلاب فيها بيوصل لـ40 طالب يعنى متفرقش عن حصة المدرسة العادية, والمجموعة المميزة عدد الطلاب 15 طالب وبتكون بـ 40 جنية برضة الدرس أحسن . 

وماذا عن مراكز مجموعات التقوية الخاصة ؟

المراكز الخاصه بتكون مجانية فى أول السنة يعتى أول وتانى حصة مثلا بهدف الدعاية للمركز وبعد كدة بتصل إلى 15 جنية للحصة و20 جنية للمراجعة النهائية وعدد الطلاب بيكون كتير أوى حوالى 300 طالب فى حصة التقوية الواحدة وتكون بنين وبنات وتحدث معاكسات وخناقات عقب كل حصة وبيعملوا دعاية للمراكز بتوزيع ورق دعاية للمركز امام باب المدرسة عقب إنتهاء اليوم الدراسى ومن أشهر هذه المراكز ( حورس , النجاح , القمه , مجموعات الصلاح ). 

وإية مادة العسكرية إللى إنتوا بتدرسوها ؟

قال لأ دى مادة كدة وكدة !!!!

 يعنى إية ؟

علشان المدرسه المفروض إنها مدرسة عسكرية ولا زم يكون فيها ضباط وعساكر علشان يدرسولنا مادة التربية العسكرية . 

طب هما بيعملوا معاكوا إية ؟

بننزل فى حصة التربية العسكرية الملعب ومش بنعمل حاجة . 

وفى حوار أخر مع أحد الطلبة الراسبين (بيعيد السنة ) ! 

قال أنهم بدأوا الدراسة متأخرين ثلاثه أسابيع ولم يكن لهم فصول خاصة بهم ولا يكون لهم مدرسين ثابتين  فالمادة الواحدة بيدرسها أكثر من ثلاثه مدرسين مما يؤدى إلى تشتت الطلاب ولا يوجد لديهم نظام حضور وغياب يعنى بيعاملوهم أكنهم طلاب درجة ثانية . 

 الحوارات تم إجراءها مع بداية العام الدراسي الماضي ولا نظن أن الأحوال تغيرت هذا العام.